Xa estamos no ecuador do inverno, tempo propicio para degustar os cocidos, e achégase o evento gastronómico de referencia na Ribeira Sacra, o “Estase cocendo”.
A organización corre a cargo da Delegación da Zona Sur da Asociación Provincial de Empresarios de Hostalería de Lugo que presentará, nun acto aberto ao público, o XI Estase cocendo o vindeiro venres 8 de febreiro ás 18:30 h. no Salón de Actos do Centro do Viño da Ribeira Sacra de Monforte de Lemos.
Volven así, as xornadas gastronómicas dedicadas ao cocido que transcorrerán do 9 de febreiro ao 10 de marzo, ambos días incluídos. Os establecementos hostaleiros da Ribeira Sacra Lucense realizarán tapas e menús especialmente relacionados co cocido e expoñerán nos seus locais información referente ao evento como carteis e dípticos coa relación de participantes nesta edición.
Como vén sendo costume tamén se realizará o sorteo dun porco de máis de 100 quilos e durante o tempo que duren as xornadas realizaranse diferentes actividades para que a xente se anime a saír da casa, se mova polas rúas das vilas, visite as fermosas paisaxes da contorna e, como non, deguste o cocido típico deste tempo.
A organización informa así mesmo que se busca implicar tamén ao gremio hoteleiro que ofrecerá aloxamento nas mellores condicións económicas posibles para que se anime a visitar a zona xente de fóra e aproveite para pasar estancias máis longas tendo moito que ver na Ribeira Sacra, tanto paisaxes como entroidos típicos.
O padriño do “Estase cocendo 2019” será o actor galego Monti Castiñeiras. Un profesional cunha longa traxectoria no audiovisual galego e coñecido máis recentemente polos seus papeis de “Santos” na serie de ficción da TVG “Serramora” e como Luís Colón “Colombo” na serie “Fariña” producida por Atresmedia.
