Segundo unha testemuña dos Covallos, antigo Poblado de Iberduero, parroquia de Montefurado, o lume puido empezar na beira da N-120 dirección Quiroga e pasado o túnel desta estrada á altura do coñecido túnel romano de Montefurado.
No lugar coñecido como ‘O Muñón’, onde se xuntan os ríos Bibei e Sil e onde se atopa o solar dun proxecto de gasolineira frustrado, foi quizais o punto onde se orixinou o lume que se propagou rapidamente pola ladeira da montaña dirección Montefurado e remontando por enriba do túnel da N-120.
Como se pode aprezar nas fotos cedidas a Xornal de Lemos, o lume chega moi preto do túnel romano de Montefurado, lugar emblemático para o Xeoparque Mundial da Unesco Montaas do Courel e espazo recoñecido como BIC da Ribeira Sacra.
A persoa coa que falou Xornal de Lemos tivo a oportunidade de ver a evolución do incendio ao vivir do outro lado do río Sil, no lugar dos Covallos. Comenta que houbo momentos nos que se tivo que cortar o tráfico de N-120 para poder traballar na extinción e que incluso se deu a situación de que o lume pasou esta estrada e prendeu no monte que queda na beira contraria entre a vía de comunicación indicada e o río Sil. “E que non veña unha moxena ata aquí e nos prenda tamén” comentaba.
Consultadas as fontes da Consellería de Medio Rural sabemos que o lume segue activo pero con evolución favorable e que efectivamente houbo cortes puntuais na N-120 para facilitar labores de extinción. Nos traballos mobilizáronse 4 helicópteros, 8 brigadas, 3 axentes e 4 motobombas. O lume está afectando a unhas 8 hectáreas de monte raso e a circulación na N-120 está totalmente reestablecida.
Agora, só queda esperar que se extinga totalmente evitando que o lume chegue á aldea de Ermidón e á de Montefurado pola ladeira que avanzaban as lapas.
