Piden cinco anos de cárcere para o home que abusou da filla menor duns amigos en Monforte

O ministerio fiscal tamén require seis anos de liberdade vixiada e a prohibición de achegarse á vítima ou comunicarse con ela durante outro seis anos.

Audiencia Provincial de Lugo | Google

O ministerio fiscal solicita cinco anos de cárcere e outros seis de liberdade vixiada para un home que será xulgado este xoves, día 31 de outubro, na Audiencia Provincial de Lugo, por abusar sexualmente da filla duns coñecidos seus, cando a vítima tiña quince anos de idade. Os feitos sucederon o 24 de agosto de 2016, na vivenda que usaban para pasar as súas vacacións os coñecidos do acusado, na zona de Monforte de Lemos.

Segundo o relato do ministerio público, o acusado entrou na vivenda dos pais da rapaza porque xa estivera noutras ocasións na casa, dado que era coñecido deles e realizara algunhas obras no inmoble.

O día de autos, sobre as 15:45 horas, a vítima estaba a durmir na súa habitación, no domicilio vacacional dos seus pais, cando se decatou de que alguén entrara na súa habitación, pero como pensou que se trataba do seu pai e estaba tapada cunha saba, díxolle que non a destapase, porque “tiña febre”.

Con todo, o acusado, supostamente, apartoulle a saba, polo que a adolescente deuse conta de que non se trataba do seu pai e ao incorporarse atopouse co home, que estaba sen camisa e, con “ánimo libidinoso”, achegouse á súa cara para bicala, á vez que lle acariñaba a coxa.

A moza púxose “moi nerviosa”, segundo o fiscal, pero conseguiu chamar por teléfono a unha amiga de forma disimulada “para pedir axuda”, momento no que o acusado saíu da habitación.

Aos poucos minutos, “regresou en calzóns”, polo que ela saíu da cama e, á vez que seguía falando por teléfono escondeuse na planta baixa da vivenda á “espera de que chegasen as súas amigas”.

Os pais da vítima non quixeron formular denuncia, pero dado que a menor na súa declaración en sede xudicial expresou o seu desexo de denunciar os feitos, o ministerio fiscal “sostivo o exercicio da acción penal”.

O ministerio público considera os feitos un delito de abuso sexual a unha menor de 16 anos e pide para o acusado unha pena de cinco anos de prisión, seis de liberdade vixiada e a prohibición de achegarse á vítima ou comunicarse con ela durante outro seis anos.EFE

DEIXAR UN COMENTARIO

Please enter your comment!
Please enter your name here