A Banda de Música de Sober cumpre este ano o seu 150 aniversario. Por iso, durante os próximos meses organizará unha serie de actos para celebrar esta feliz data. O primeiro consistirá nun concerto da formación, no que estarán acompañados polo grupo local “Os Parentes”. A actuación terá lugar o sábado día 13 de xullo ás dez da noite na Praza do Concello.
No mes de agosto a Banda preparará un gran concerto coa participación de todos os músicos e directores que teñan formado parte da institución. Posteriormente farán un xantar de confraternidade para conmemorar este século e medio de música.
Dende a propia Banda soberina agradecen a colaboración de todas as persoas que fan posible esta celebración e aseguran que este fito axudará a seguir facendo historia nun concello cunha enorme tradición musical. Pola súa parte, o alcalde Luis Fernández Guitián convida a todos os veciños a participar destes actos.
