O Concello de Taboada celebra do 9 ao 12 de agosto as súas Festas Patronais na honra á Virxe dos Milagres. O día 9 celébrase o Día dos nenos e nenas, que organiza o Concello de Taboada. De 17.00 a 19.30 na rúa do Pavillón contarase con hinchables con movemento, tobogáns acuáticos, circuito de kars e festa da espuma. Nesta xornada ten lugar tamén, a Festa da Mocidade que organiza Marrao Enxebre. Comezarase ás 18.30 con ruta polos bares coa charanga Os Celtasce. Ás 22.00 terá lugar a cea popular para ás 23.30 comenzar cos concertos a cargo de Liviao de Marrao, Ezetaerre, Louband Oficial, Grilo e TIAM. Coa camiseta da festa, que se pode adquirir por 15 euros, contarase con cea, cervexa e calimocho.
Entre tanto, a Asociación Novas Festas de Taboada, encargada das actuación da Alameda, trae á orquestra Gran Casino para darlle unha opción de festa á xente maior e ás familias na noite do primeiro día. Segundo a Asociación Novas Festas, formada polo sector hostaleiro, nesta noite búscase darlle festa á veciñanza sen competir coa festa da xuventude.
O sábado, día 10, a Banda de Guntín encargarase da sesión vermú. Nesta xornada celébrase o Día da Bicicleta, con saída da Medela ás 11.00. A cita está organizada polas escolas deportivas do Concello de Taboada. Ás 19.00 terá lugar a Ruta polos bares que organiza a Asociación Cultural Os Afogapalletas. Na Alameda haberá ás 23.30 concerto dos Parentes de Sober e ás 1.30 Os Gin Toni´s
Na xornada do domingo, día 11, comezarase ás 12.30 misa cantada pola Coral Polifónica de Taboada. A procesión e sesión vermú será coa Banda de Antas de Ulla que ás 21.30 ofrecerá concerto de rock, versionando temas de rock clásico. Ás 18.30 terá lugar o partido de fútbol na Medela, entre Taboada CF e SD Sarriana. Ás 23.00 comezará a verbena coa orquesta La Fórmula, que primeiro fará un pase para todos os públicos e as últimas duas horas as adicará á mocidade.
No útimo día, o12 de agosto, celébrase a Festa do Óso na Medela, contando coa charanga “Era visto”. O Festival Folclórico comezarás ás 19.00 co grupo de gaitas, canto e danzas Os D´Eiquí de Taboada e o conxunto ruso de danza popular, Yunost. A cita organízaa o Concello cos D´Eiquí. O punto e final na Alameda farase coa verbena a cargo de Charleston Big Band.
Desde a Asociación Novas Festas, encargada das verbenas e parte da programación, aseguran que fixeron un esforzo por recuperar o espírito de facer festas para todos os públicos e con actuacións de calidade. Aproveitan para convidar a veciños e visitantes ás Festas dos Milagres.
