Este 15 de agosto, a Corporación Municipal encabezada polo Alcalde de Monforte, José Tomé Roca, participou nos actos litúrxicos de honra á Patroa da cidade, a Virxe de Montserrat.
Xunto cos fogos de San Vicente, que tiveron lugar ás 12 da noite, estas son as dúas únicas actividades relacionadas coas Festas Patronais de Monforte que se levaron a cabo este ano. O resto de actividades propias das festas patronais suspendeuse por responsabilidade sanitaria cos veciños e veciñas de Monforte ante o Coronavirus.
A comitiva oficial encabezada polo Alcalde e formada por diversos membros da Corporación Municipal, así como por representantes dos Corpos e Forzas de Seguridade do Estado, partiu ás 10:40 horas da Praza do Concello, como é tradición, para dirixirse á igrexa da Régoa, ao ser a igrexa de San Vivente obxecto de obras de restauración.
Durante a procesión posterior á misa, que tivo lugar no atrio da igrexa, levouse a cabo unha ofrenda floral reducida e acotada, co obxectivo de evitar a concentración de persoas por mor da Covid-19.
Tras a ofrenda e a celebración diante da Virxe de diversos bailes tradicionais ó son da música dos gaiteiros, que tamén foron protagonistas nesta celebración, a imaxe da Virxe voltou ó interior da igrexa, dándose por concluídos os actos litúrxicos na súa honra.
Os Fogos de San Vicente pecharon os actos do día 15. 20 minutos de espectáculo no que a luz iluminou a cidade do Cabe nestas patronais da nova normalidade.
