Preto de 2.000 persoas participaron durante a Semana Santa nalgunha das rutas fluviais en catamarán da Deputación de Lugo e que transcorren polos ríos Miño e Sil. Entre o sábado 27 de marzo e o domingo 4 de abril, o embarcadoiro Ponte do Sil rexistrou 1.392 viaxeiros e o de Belesar 446.

En concreto, engade o departamento provincial, as embarcacións de Ponte do Sil e Belesar estiveron practicamente completas nos días festivos, con aforamento reducido á metade debido ás restricións sanitarias.

A deputada de Réxime Interior, Promoción do Territorio e Turismo, Pilar García Porto, destacou os datos como “moi positivos” e que confirman a “tendencia á alza” deste servizo a pesar do contexto de pandemia.

Doutra banda, uns 50 traballadores e edís de 34 entidades locais da provincia participan desde este luns na acción formativa en liña ‘Promoción e Comercialización de Produtos e Servizos Turísticos Locais’, organizada pola Deputación de Lugo no marco das súas accións de apoio aos sectores prexudicados pola crise sanitaria.