O presunto autor é identificado cando regresaba no seu vehículo particular dunha xornada de pesca no río Soldón ao seu paso polo termo municipal de Quiroga. Os axentes observan na parte traseira do vehículo unha neveira que contiña un total de 55 exemplares de troitas, as cales non daban na súa maioría a medida mínima e excedían o número máximo de capturas permitidas.

Este tipo de feitos conlevan a retirada dos especímenes, os cales se entregan en entidades benéficas e que supoñen a perda da licenza de pesca durante un ano, así como a inhabilitación para obtela de novo durante o mesmo tempo, e unha sanción de carácter económico que oscila entre os 100 e os 3.000 euros.

A aprehensión prodúcese nunha zona coñecida pola súa altísima riqueza paisaxística, ambiental e con especial valor ecolóxico, como é o xeoparque do Courel.