Co gallo do Día das Letras Galegas, o Colectivo Egeria vén de publicar o libro que se presenta en Sarria, “Aquela nena de Sarria”, e que versa sobre os anos sarriáns e lucenses de Xela Arias.
Esta obra forma parte do proxecto do mesmo nome, promovido polo Colectivo Egeria, co patrocinio da Xunta de Galicia, e a colaboración da Real Academia Galega e o Concello de Sarria. Este proxecto está composto por unha web, unha exposición itinerante que chegou e chegará a numerosas cidades e poboacións de Galicia, e un catálogo que recolle os contidos da exposición.
A OBRA
O libro, que amplía os contidos da exposición xunto con outras diversas informacións, segue a estrutura da mostra, e conta con poemas e debuxos de arredor de medio cento de estudantes dos institutos de Sarria –coordinados polos profesores Lola Chaos e Eduardo Rey–, poemas de autores sarriáns actuais e das escritoras “compañeiras de viaxe” de Xela, os primeiros traballos coñecidos da autora homenaxeada, colaboracións de Xaime Félix López Arias –que foi cronista de Sarria, gran amigo da familia– e Asunción Fernández Puentes (Siña), Directora do Colexio Fingoi. Recolle tamén textos de Avelino Pousa Antelo, Valentín Arias, Amparo Castaño, Lois Arias Castaño, Darío (o fillo de Xela) e once “vilariñas” dos poetas membros do colectivo Nova Poesía Guitírica, na honra de Xela.
Nas 184 páxinas desta obra, da que son responsables Antonio Giz e Xulio Xiz, teñen un especial papel as fotos da nenez de Xela facilitadas pola familia Arias-Castaño, en base ás que a pintora e profesora lucense Sabela Arias fixo unha serie de magníficas recreacións que lle dan ao libro e ao resto das accións deste proxecto un carácter esencialmente xuvenil, plenamente acorde con esta primeira etapa vital de Xela.
