Ana María González Pazos é valenciana pero ten as súas raíces en Proendos, no Concello de Sober. Deste lugar era a súa nai, os pais dela e tamén os seus avós.
A emigración fixo que esta soberina –a súa nai– chegase a Valencia, cidade onde se estableceu, coñeceu á súa parella e viu nacer á nosa protagonista. En calquera caso, Ana María di que as raíces tiran moito e recoñece que non perdeu o contacto con Sober, lugar onde vén de visita de cando en vez para encontrarse coa moita familia que lle queda por aquí.
Aproveitando que estes días está por estas terras, Rafa Aguiar convidouna a Radio Monforte e fíxolle unha entrevista moi interesante na que desvela as súas orixes soberinas e como a vida artística a levou polos camiños do rock.
Conta, entre outras moitas cousas, que foi incluída nun proxecto coñecido como “Ellas son eléctricas”, un vinilo e un documental que homenaxea ás mulleres pioneiras no Rock duro e o Heavy Metal da década dos 80 e 90. Os autores deste traballo de investigación son Leo Cebrián Sanz e Paco Manjón e unha páxina de Facebook serve de escaparate para divulgar o proxecto.
Aquí unha actuación de Ana María González co grupo Tarántula, do que formou parte naquela época, en directo no mítico programa de TVE ‘Aplauso’.
A entrevista completa a esta muller, unha das pioneiras do rock español, pódese escoitar o descargar no podcast de Radio Monforte.
