Este mércores, 14 de xullo, a Tenente Alcalde, Gloria Mª Prada recibe no Centro do Viño de Monforte aos 15 Emprendedores que se forman ao longo do Camiño Creativo de Santiago. Ademais intervirá a deportista, Saleta Fernández, quen dará unhas palabras sobre o necesario paralelismo entre os valores do deporte e o emprendemento, tales como o esforzo, a superación, a constancia, o fracaso e o éxito como partes do camiño,..,
Estará acompañada por Belén Elisa Díaz, monfortina Presidenta da Asociación España Creativa, ideóloga do proxecto. Na ETAPA-5, en Monforte de Lemos, ademais impartirase de maneira gratuíta e aberta, un Taller sobre o desenvolvemento do Proxecto Emprendedor con Emilio Froján, CEO do Instituto do Talento, que se desenvolverá no Centro Cívico, en horario de 15:00 h a 19:00 h.
Na Sala da Cultura ás 20.00 h terá lugar o Encontro sobre “Repensar a Industria do Cinema no contexto actual e as novas oportunidades de negocio do sector audiovisual no mundo rural”. Participará o director de “O que arde”, Oliver Laxe; xunto coa cineasta de animación Chelo Loureiro fundadora da produtora Abano Produccións en 2007, ademais, de importante activista polo recoñecemento das mulleres dentro do campo audiovisual.
Non é necesaria a inscrición para calquera das 3 actividades, ata completar aforo.
O Camiño Creativo e a aventura de emprender
O Camiño Creativo realízase ata o 25 de xullo presencialmente e tamén virtualmente. Ambas as realidades discorren paralelamente nun mesmo territorio que é tamén patrimonio vivo declarado Patrimonio da Humanidade, o primeiro itinerario europeo, o propio Camiño de Santiago.
O obxectivo do camiño é xerar redes para potenciar a cultura do emprendemento e emprender xuntos, en momentos complicados como os actuais. En outubro farase unha nova actividade para pechar o ano cun Encontro dos Emprendedores do Camiño Creativo en Santiago de Compostela. No 2022, culminaríase coa realización do Camiño Creativo completo de Madrid a Santiago, unindo tres camiños, o Camiño de Madrid, o Camiño Francés e o Camiño de Inverno, pasando por 3 comunidades autónomas, 6 deputacións e 30 concellos, un total de 40 días, todo un reto e unha experiencia única, semellante a “a aventura de emprender”.
