A conselleira de Medio Ambiente, Ángeles Vázquez, e o delegado territorial da Xunta en Lugo, Javier Arias, xunto co alcalde de Pantón, José Luís Álvarez, visitaron neste municipio a nave de usos múltiples que se reformará ao abeiro do programa de apoio ás entidades locais para instaurar o ‘fermosismo‘. O obxectivo é combater o feísmo nos concellos de menos de 20.000 habitantes.
A Consellería vén de resolver esta orde de axudas, convocada en xaneiro por 600.000 euros e cuxo crédito acaba de ampliarse ata os 800.000 euros. A mesma, recolle dúas liñas de actuación: a primeira subvenciona obras para emendar o impacto negativo que causan sobre a contorna edificacións nas que se prestan servizos municipais, e a segunda está pensada para mellorar equipamentos públicos propiedade dos concellos, con especial fincapé nos elementos etnográficos.
As achegas poden acadar o 70% do custo estimado –ata un máximo de 20.000 euros por liña– e as actuacións teñen que cumprir unha serie de requisitos. As condicións máis importantes para poder beneficiarse das axudas é que as obras realizadas cumpran os criterios fixados na Guía de cor e materiais de Galicia ou os que recolle tamén a Guía de boas prácticas de caracterización e integración paisaxística de valados.
O Concello de Pantón mellorará o aspecto da súa nave de usos múltiples, substituíndo a cuberta de chapa por outra de panel tipo sandwich, e recebando e pintando os muros de bloque, ademais de incorporar canles e baixantes de aluminio lacado e construír un novo peche da parcela. Para estes traballos recibirá unha axuda máxima de 20.000 euros.
Respecto dos outros concellos beneficiados, o Concello de Sober recibe 14.000 euros para renovar o palco da música de Proendos, Ribas de Sil terá 13.000 euros de financiamento para actuar nos paramentos verticais dun depósito de augas municipal e dun muro de contención situados na área recreativa de San Clodio, e o Concello de Chantada contará con 10.500 euros para actuar no lavadoiro da Portada, na traza do Camiño de Santiago.
