Pechados xa todos os detalles do programa de festas de Escairón nun cartel espectacular no que destacan, por exemplo, orquestras top de Galicia, o grupo Gin Toni’s e o cantante Bustamante.
Escairón, capitalidade do Concello do Saviñao, prepárase xa para as grandes festas do verán e do ano, festexos na honra da Virxe das Dores, que comezarán o día 5 e rematarán o 9 de agosto.
PROGRAMA
O venres 5 de agosto, primeiro día de festexos, haberá un festival de charangas e actuarán as orquestras Europa e CLK.
Chegando ao sábado 6 terá lugar a X Carreira Popular do Saviñao na que se abre a inscrición en diferentes categorías, tendo a absoluta un percorrido de 8 quilómetros. Para anotarse, con data límite o 4 de agosto, os e as interesadas poden facelo a través do correo deportes@concellodosavinao.com. A saída da carreira comezará ás 11:00 h. para as categorías inferiores e ás 12:00 para os e as que compitan na absoluta.
E pola noite, festa total coa actuación de Bustamante e verbena a cargo da orquestra Punto Clave.
O domingo 7, como non, Misa solemne ás 13:00 h. e procesión con pasarrúas do grupo tradicional local Os Tarabelos e sesión vermú a cargo da banda de música de Muimenta. Xa pola noite, concerto dos Gin Toni’s e verbena a cargo da orquestra Solara.
Para o luns hai que anotar para os máis pequenos a Festa da Escuma ás 17:00 h. con inchables de balde no Campo da Lama e ambientación da charanga Os Centellas. Pola noite, orquestras Charleston Big Band e Saudade.
E como pasa en moitos casos, o mellor, a guinda do pastel, a traca final, queda para o peche dos festexos. O martes, 9 de agosto, ademais da charanga Union Phenosa, hai unha cita obrigada coa ‘Carreira de burros’ ás 12:00 h. e cómpre prepararse moi ben para o que chega pola noite: nunha mesma verbena estarán as orquestras Combo Dominicano e Panorama… quen dá máis?
