Castiñeira lembrou que a voceira socialista e delegada de Turismo, Pilar García Porto, aseguraba en xuño do 2020 no debate dunha proposta do Grupo Popular que a expectativa do goberno provincial era “poñelo en marcha nos próximos tempos, canto antes mellor”. Polo tanto, “queda claro o seu incumprimento: non foi en próximas datas, pasaron xa dous anos e segue pechado”.
Ademais da falta de datas claras por parte da delegada de Turismo, o voceiro popular condena “as formas” que supoñen “unha falta de respecto aos veciños de Quiroga, ao Concello que está preocupado porque funcione canto antes esta área recreativa; senón a tódolos veciños da provincia”. Castiñeira considera “evasivas” as respostas “dando a entender que é un tremendo lío e que non lles interesa”.
Castiñeira sinala tamén que é “ofensiva a falta de asunción de responsabilidades por parte de García Porto, botando balóns fóra e culpando a unha inexistente concesionaria e a gobernos anteriores, cando levan 15 anos gobernando na Deputación sen facer nada”.
O voceiro do Grupo Provincial Popular cre que “a delegada de Turismo debe pedir desculpas aos veciños de Quiroga e debe dar un paso adiante” porque “o único que nos avanzou é que se acaba de conseguir o permiso da Confederación Hidrográfica; pero aínda hai moitas cousas por diante para facer. Botamos en falta unha resposta clara e concisa”, conclúe.
