A primeira das catro etapas da volta ciclista profesional “O Gran Camiño” será o vindeiro 23 de febreiro e traerá algúns dos mellores ciclistas e equipos internacionais as comarcas de Lugo, Sarria, A Ulloa, Chantada e Lemos.
O pasado mes de decembro confirmábase que a saída será en Lugo e a chegada en Sarria, concretándose tamén o itinerario do pelotón, con paso polos concellos de Lugo, Guntín, Portomarín, Taboada, Chantada, O Saviñao, Pantón, Monforte de Lemos, A Pobra do Brollón, Bóveda, o Incio, Samos e Sarria. Un total de 188 quilómetros, con tres portos de montaña: Alto de Fontenla (2ª categoría), Cruz do Incio (3ª categoría) e San Fiz (3ª categoría).
Efrén Castro sinalou que “esta segunda edición de O Gran Camiño ofrece unha oportunidade única para amosar ao mundo o patrimonio cultural e natural de Lugo e das comarcas do Sur, xa que a presenza dos grandes nomes do ciclismo internacional asegura a atención mediática e deportiva sobre a proba”.
O responsábel provincial, ciclista afeccionado e practicante dende hai anos, referiu que o deseño do percorrido desta edición leva os ciclistas por algúns dos monumentos e espazos naturais máis emblemáticos da metade sur da provincia, desde a Muralla de Lugo ou o mosteiro de Samos ata a praia da Cova, no Concello do Saviñao. Ademais, o percorrido da proba transcorrerá polo centro histórico de Lugo e atravesará núcleos coma Guntín, Taboada, Chantada, Escairón, Monforte, Bóveda, O Incio, Oural, Samos e Sarria, localidade referente do Camiño de Santiago e fin de etapa.
PARTICIPACIÓN DESTACADA E PROXECCIÓN TURÍSTICA
A organización confirmou a presenza na proba dos equipos Team Jumbo-Visma Cycling, Movistar, Astana, Cofidis, Eolo Kometa e Corratec, e de nomes propios como o do vixente campión do Tour de Francia, Jonas Vingegaard.
Segundo trasladan tamén da Vicepresidencia da Deputación de Lugo, O Gran Camiño permitiu o ano pasado que as paisaxes galegas chegasen a millóns de espectadores de todo o mundo a través das súas canles de difusión e, principalmente, da emisión de Eurosport, constituíndo unha auténtica “xanela ao mundo” para Galicia.
