Os vehículos eléctricos, a diferenza dos de combustión, non xeran emisións de gases contaminantes mentres funcionan, polo que son a mellor opción para respectar o medio ambiente sen restar mobilidade. “A pesar das evidentes vantaxes, e ante o feito de que, en non moitos anos, os vehículos eléctricos serán os únicos que poidan desprazarse polas estradas, desde o grupo de goberno do Concello de Monforte, non ten saído ningunha iniciativa ao respecto”, por iso os nacionalistas instan ao goberno municipal a que impulse a creación de puntos de recarga para vehículos eléctricos.

A mobilidade eléctrica vai gañando terreo, pouco a pouco, na nosa sociedade, ata o punto de que o goberno do Estado ten deseñado iniciativas que axudan a fomentala. A sinxeleza do vehículo eléctrico é un dos aspectos máis importantes para os condutores, xa que é eficiente para conducir, e de fácil recarga cun cargador de coche eléctrico na casa, ou mesmo nun espazo público, converténdose nunha alternativa sostible, que cada vez vai recortando terreo aos automóbiles tradicionais.