A candidatura do PP de Bóveda para as eleccións municipais preséntase como, “A experiencia dos que mellor coñecen o territorio e os problemas dos veciños xunto ás ideas frescas dos mozos e mozas que inician a súa andaina neste equipo de traballo da política local”, explica o aspirante a repetir na alcaldía, José Manuel Arias López.

Arias afirma que a candidatura popular de Bóveda é “un equipo firme, integrado por veteranos eficaces na xestión local, que son os que mellor coñecen todo o territorio e tamén os problemas a resolver que hai en Bóveda”. Asegura que “a lista integra caras novas, mozos e mozas, que aportan ideas e que servirán aos seus veciños ao lado dos veteranos.”

Desde a candidatura aseguran que teñen como obxectivo o impulso da creación de máis solo industrial e doutras medidas que favorezan a creación de emprego no municipio e tamén atraendo máis empresas. “O próximo mandato ten que ser o de potenciar ao sector agrogandeiro”, afirma o candidato que anuncia que, se volve a desempeñar a alcaldía, xestionará “a mellora dalgúns servizos municipais”.