A segunda edición de Ultreia et Suseia celebrarase en Sarria entre o 16 de xullo e o 23 de agosto. Ultreia et Suseia, cuxo nome fai referencia ao histórico saúdo no Camiño de Santiago e que se pode traducir do latín como “Segue adiante, máis arriba”, ten un cartel de actividades conformado totalmente por artistas galegos. O evento será, fundamentalmente, de carácter gratuíto. Así, poderase gozar de espectáculos de artes escénicas de narrativa oral tanto para público adulto como familiar, dos paseos teatralizados de carácter didáctico, Camiñografías e a estrea do espectáculo de comedia dos influencers Pepe e Lucas, que contan con máis dun millón de seguidores en Tiktok.
As únicas actividades de pago serán os espectáculos cómicos Recuncho da Comedia -un show especial exclusivo para o evento de David Amor, Pablo Meixe e Danny Boy-Rivera– que abrirá o ciclo o 16 de xullo, Xosé A. Touriñán o 22 de xullo e Luís Piedrahita que pechará a programación o 23 de agosto. As entradas a través de Ataquilla.
Unha das grandes novidades desta edición de Ultreia Et Suseia é a aposta pola incorporación de asociacións culturais da comarca de Sarria. Xa está confirmada a participación de Peleiriños, Meigas e Trasgos, Huhú e Rúa da Música. Desde a organización destacan que Ultreia “é un proxecto aberto a todo o mundo que queira participar”.
Outro dos puntos fortes de Ultreia et Suseia son os seus espectáculos de artes escénicas enfocados á narrativa oral, que serán de carácter gratuíto. Pequenos e maiores poderán gozar da sesión de contacontos de Raquel Queizás, Eva Rilo Elas, Atenea Fernández ou Paula Carballeira. O proxecto está promovido por Etiqueta Negra e o concello de Sarria.
