Esta pasada semana, o director do Parador de Monforte de Lemos, Miguel Castro, e a xerente do Club de Golf Río Cabe, Mª Eugenia Graña, asinaron un acordo entre ambas as entidades para reforzar aínda máis a histórica colaboración entre o Parador e o campo de golf.

Este acordo-marco garante a renovación para os vindeiros anos do acordo de patrocinio “Torneo Paradores”, o torneo máis emblemático do calendario de competicións do club monfortino e un dos torneos de referencia no ámbito do Pitch & Putt galego.

IMAXE CORPORATIVA E SERVIZOS CON CONDICIÓNS PREFERENTES

Así mesmo, e ata o ano 2027, os 18 foxos do campo lucirán a imaxe corporativa de Paradores nas súas bandeiras. Tamén, a partir deste mesmo mes de setembro, todos os clientes do Parador de Monforte terán condicións preferentes para a reserva e adquisición de greenfees do campo de golf. Pola súa banda todos os socios, visitantes e xogadores que fagan uso do percorrido do Río Cabe poderán reservar as súas estancias para o Parador no propio club, tamén en condicións preferentes.

“Con este novo paso consolídase unha alianza estratéxica entre o Parador de Monforte e o Club Río Cabe encamiñada ao fomento da práctica do pitch & putt e ao fomento das actividades turísticas en Monforte e na Ribeira Sacra”, comentan dende a xerencia do Parador de Monforte de Lemos.