O túnel da estrada N-120 de Montefurado será esta noite o escenario dun simulacro de accidente de tráfico no seu interior coa finalidade de verificar o correcto funcionamento dos equipamentos, dos sistemas de seguridade e dos protocolos de actuación e evacuación previstos. Esta proba de seguridade ocasionará o corte da N-120 este 17 de outubro entre as 22:00 e as 2:00 h. da madrugada, corte que afectará ao tramo que vai dende o acceso a Montefurado e o acceso a Bendilló. O tráfico será desviado pola estrada LU-933.
O Ministerio de Transportes realizou melloras neste túnel no ano 2022, obras que serviron para adaptar o túnel aos requisitos de seguridade e viabilidade. En concreto, centráronse na mellora das saídas de emerxencia, a sinalización, o balizamento, a iluminación, a ventilación, a instalación eléctrica, a protección contraincendios, a drenaxe, a comunicación e a xestión do tráfico.
O SIMULACRO DE ACCIDENTE
Para avaliar a correcta organización dos servizos propios do túnel cos servicios de emerxencia exteriores o simulacro debe ser o máis realista posible. Deste xeito, simularase un accidente de tráfico grave por colisión entre varios vehículos con resultado de incendio nun deles e con varios vehículos atrapados no interior do túnel, provocando retencións nos accesos e no interior do mesmo. Para darlle máis realismo se cabe, no interior do túnel utilizarase unha máquina de fume quente para recrear condicións de escasa visibilidade que dificulten as tarefas dos servicios de emerxencia.
O persoal de xestión do túnel (Ministerio de Transportes, Movilidad y Agenda Urbana) e os servizos externos de emerxencia (Guardia Civil de Tráfico, Bombeiros, servicios sanitarios, etc.) entre os que se atopan os GES de Quiroga, axentes da Garda Civil do posto de Quiroga e voluntarios locais de Protección Civil participarán nesta proba de seguridade.
