O pasado mes de abril este xornal informaba da compra dunha aldea de Sober, Donelle, pola cooperativa Ecooo, organización que promove as enerxías renovables e o autoabastecemento enerxético impulsando tamén proxectos de preservación ambiental. En relación a esta última actividade enmárcase o seu proxecto “Guardabosques” no que as construcións en ruínas actuais desta aldea pasarán a converterse nun “espazo de encontro e transformación”, así como tamén nun “espazo de experimentación intelectual e física, un lugar de encontro, de cooperación e un refuxio climático”.
A rehabilitación do conxunto non comezará ata o 2025, segundo informaban da cooperativa, pero as accións formativas xa comezaron esta primavera con dous cursos na primeira quincena de maio que trouxeron a Rosende á antropóloga e activista feminista Yayo Herrero, e ao naturista Joaquín Araujo. Este mes de xuño o protagonista do encontro formativo será o coñecido actor e humorista Pepe Viyuela.
CURSO CON PEPE VIYUELA
Dende a súa experiencia, e baixo o título “El humor en el tiempo de los monstruos”, trasladará aos presentes o poder do humor como ferramenta dos movementos sociais para ampliar e consolidar dereitos ou para combater o medo e a represión.
Tal como refiren dende a organización, “Pepe Viyuela abordará, de xeito humilde e sen pedantería“, interrogantes coma estes: “Como se resiste ao temporal autoritario? Cales son os resortes e mecanismos que presenta o humor para subverter as doutrinas do medo e da represión? Que papel poden xogar os humoristas, bufóns e paiasos ante os medios de comunicación controlados polas grandes elites?”.
O curso desenvolverase os días 14, 15 e 16 de xuño na Casa Grande de Rosende, no Concello de Sober. O comezo será o día 14 ás 18:00 h. e o remate o domingo 16 ás 16:00 h.
A proposta está aberta a 25 prazas e ten un prezo de 350 € incluíndo habitación compartida e pensión completa. Os socios e socias do proxecto Guardabosques terán un desconto do 5% e para inscricións e/ou aclaración de dúbidas facilítase por parte da organización o teléfono 91 294 00 94 e o correo electrónico seguinte: guardabosques@ecooo.es
PEPE VIYUELA
José Viyuela Castillo, máis coñecido como Pepe Viyuela, estudou filosofía e arte dramático sendo hoxe un pallaso, actor e humorista ben recoñecible do panorama televisivo e cinematográfico español. Pero non queda aí a súa faceta creativa, pois tamén destaca como activista social, escritor e poeta.
O seu papel máis popular en series de ficción foi o de Chema –o tendeiro de Aída (Telecinco)–, co que ademais acadou no 2013 o ‘Premio Ondas ao mellor intérprete masculino de ficción nacional’. Tamén participou en varios programas de televisión e no eido do teatro, conquerindo neste caso o ‘Premio Max a mellor actor’ pola obra Rinoceronte no ano 2016.
En cinema será lembrado, entre outros, por papeis como Filemón nas películas ‘La gran aventura de Mortadelo y Filemón’ (2003), dirixida por Javier Fresser, e ‘Mortadelo y Filemón. Misión salvar la Tierra’ (2008), dirixida por Miguel Bardem. E como clown sempre teremos presentes os números mímicos de zoupón cos que empezou en míticos programas como foi o “Un, dos, tres”.
Como activista en movementos sociais salientar que foi presidente da ONG ‘Payasos Sin Fronteras’ –segue na directiva–, e ten actuado con outros artistas en países en conflito como Palestina, Irak ou Kosovo. É tamén socio honorífico das ONG ‘Amigos de la Tierra’ e ‘Saniclown’.
