A Xunta de Goberno da Deputación de Lugo aprobou este venres a adxudicación por un importe que supera os 300.000 euros das obras que se van realizar en dúas estradas do concello do Saviñao.
Adxudicáronse con preto de 230.000€ os traballos de acondicionamento do firme LU-P-3202, a vía que comunica Monforte con Currelos. Esta actuación realizarase no treito que vai do punto quilométrico 11,067 ao 24,436. As obras terán un prazo de execución de algo máis de 3 meses e consistirán na apertura das cunetas, a reparación do firme e a repavimentación. Este novo investimento completa aos outros tres proxectos acometidos pola institución nesta estrada, por unha cantidade total de preto de 600.000€.
No Saviñao a Xunta de Goberno tamén adxudicou por preto de 80.000 euros á empresa Fevisa Vías e Obras SL as obras de repavimentación na LU-P-5804, que vai a Ereixafeita por Cazón. O prazo de execución destes traballos é dun mes e inclúen o acondicionamento de 500 m2 de superficie mediante un dobre tratamento superficial.
Por outra banda aprobouse tamén a adxudicación das tarefas de desbroce de estradas en 8 concellos, entre os que están Taboada e O Saviñao. E déuselle o visto bo ás solicitudes dos concellos de Sarria e A Pobra do Brollón para investir remanentes do Plan Único do ano 2023 en novas actuacións. Sarria empregará máis de 34.000 euros para a rexeneración de tres estradas no municipio que dan acceso á Escola de Loureiro, Betote de Abaixo polo Piñeiro, San Miguel de Vilapedre e Feculera. Por último, A Pobra do Brollón utilizará preto de 7.000 euros para a humanización da rúa da Igrexa e a Praza da aldea de Rairos, en Cereixa, e outros 514 euros para a dixitalización dos sistemas de abastecemento de augas nesta mesma parroquia
