O voceiro socialista, Miguel Ángel Fernández, apunta que “tras varios anos de reiteradas solicitudes de información crucial para a fiscalización da xestión municipal”, seguen sen ter resposta. “Levamos varios anos solicitando por rexistro que se nos facilite información e nunca se nos contesta nin se nos remiten eses datos. Aseguran que non teñen tempo a buscar información”, alerta o socialista.
A información solicitada é a seguinte:
- Datas de aprobación inicial e definitiva dos orzamentos ordinarios dos anos 2019, 2020, 2021 e 2022.
- Datas de aprobación da Conta Xeral dos anos 2018, 2019, 2020 e 2021.
- Os decretos polos que se aprobou a Liquidación dos orzamentos dos anos 2018, 2019, 2020 e 2021.
- Decretos de prórroga dos orzamentos dos anos 2018, 2019, 2020 e 2021, se é o caso de que se prorrogase algún dos orzamentos.
- As datas nas que se remitiron ao Consello de Contas de Galicia e ao Tribunal de Contas do Estado as contas dos anos 2018, 2019, 2020 e 2021.
- A información que o Consello de Contas de Galicia puidera ter remitido no caso de ter realizado algunha auditoría.
Fernández apunta que “esta falta de resposta dificulta o noso labor de oposición e control democrático e vulnera os principios básicos de transparencia e bo goberno que deben rexer calquera administración pública”.
Nesta situación, desde o PSOE esixen ao equipo de goberno do Concello que cumpra cos seus deberes legais e democráticos e facilite de inmediato toda a información solicitada. “Reiteramos a nosa disposición a seguir traballando en prol da transparencia e a boa gobernanza, co obxectivo de garantir que a xestión municipal se realice de forma aberta e accesible para toda a cidadanía”, conclúen os socialistas.
