O Presidente da Deputación de Lugo e Presidente do Consello Provincial de Turismo, José Tomé Roca, presidiu no Día Mundial do Turismo, o acto de entrega dos quintos premios á excelencia do turismo e a gastronomía da provincia. “Todos os premiados sodes unha representación da calidade, da variedade e da riqueza turística e gastronómica de Lugo”, manifestou o mandatario provincial durante o evento.

As entidades premiadas recibiron un diploma e unha peza de cerámica de Gundivós, que acreditan este recoñecemento realizado dende o Consello Provincial de Turismo, un órgano consultivo e de participación para favorecer a gobernanza turística da provincia que foi promovido e está presidido pola Deputación de Lugo.

O Presidente da Deputación de Lugo puxo en valor as iniciativas distinguidas coas que “percorremos costa e interior, falamos de  paisaxes e de deporte, de cultura e etnografía; de ocio adaptado para unha pequena escapada ou para viaxar en familia”. Unha variedade, engadiu “da que nos temos que sentir orgullosos e que debe motivarnos a todos e a todas para seguir traballando”. A este respecto asegurou que a Deputación seguirá impulsando estes recoñecementos, “é a mellor receita para loitar contra a masificación é a diversificación, a aposta por dar a coñecer destinos novos, polo turismo de familia, vinculada ao deporte ou adaptado a todas as idades”.

Na categoría Lugo Cambia ao turismo lucense, distinguíronse dous proxectos turísticos: A Ruta dos Lobos da Fonsagrada e A Mina Consuelo e Boulloso impulsada polo Concello da Pontenova.

Polo que respecta á categoría …E para comer, Lugo á gastronomía lucense, o Concello de Ribas de Sil recibe este galardón pola súa Festa da Cereixa, do Viño e da Aceite que pon en valor tres produtos de calidade da gastronomía da provincia. Hai xa 22 anos que o Concello de Ribas de Sil decidiu que era preciso poñer en valor un produto tan singular como é a cereixa, que fai que madure antes que en moitas outras zonas. Tamén nesta categoría foi galardoada a Feira do Capón de Vilalba.

Por último, na categoría de Turismo Sostible resultou gañador o Barco Museo Reina do Carmen de Burela por dar a coñecer e conservar o patrimonio etnográfico relacionado coas xentes do mar. O Consello de Turismo tamén decidiu outorgar na categoría Turismo Sostible un accésit á Mostra Exposición de Muimenta (Moexmu).