O vindeiro mércores 30 de xullo, de 10:30 a 12:30h, terá lugar en Monforte unha actividade singular que busca achegar á cidadanía as historias e experiencias das persoas emprendedoras que sosteñen o tecido económico local. Trátase, como presentan dende ‘Acción contra a Fame Galicia’, dun Free Tour baixo o lema “Ponlle cara aos negocios de Monforte”.

O paseo, que partirá da Praza de España ás 10:30h (identificable cun paraugas azul), incluirá varias paradas en negocios locais seleccionados, onde os seus responsables compartirán a súa traxectoria emprendedora, así como os desafíos e motivacións que os/as acompañan no seu día a día.

A actividade está organizada no marco do Clube de Emprendemento, un espazo de encontro e dinamización dirixido a persoas emprendedoras, empresas, entidades sociais e a todas aquelas que apostan polo emprendemento como ferramenta de transformación e futuro no rural; e a iniciativa forma parte do proxecto “Comunidades de Emprego e Emprendemento Rural Sostible”, desenvolvido por Acción contra a Fame Galicia e financiado polo FSE+ e a Fundación MAPFRE.

A participación é aberta e gratuíta, pero agradécese que se confirme asistencia a través do seguinte formulario: https://bit.ly/freetournegocios. Para máis información, as persoas interesadas poden contactar con Ana no teléfono 648 16 68 48.