Este luns pola mañá celebrouse no concello de Monforte xunta de voceiros, convocada polo rexedor tras o ataque con cócteles molotov producido na madrugada do pasado sábado, 20 de setembro, contra o edificio de Prodeme elixido pola Xunta de Galicia para dar acollida a 80 menores estranxeiros non acompañados.
Asistiron á reunión a Teniente de Alcalde, Gloria Prada; a voceira do grupo municipal do Partido Popular, Katy Varela; o voceiro de grupo do BNG, Emilio Sánchez, e o voceiro de Esperta Monforte, Germán Vázquez. Todos os representantes municipais acordaron de forma unánime a seguinte declaración institucional á que se lle dará lectura no vindeiro pleno municipal:
Declaración institucional
O Pleno do Concello de Monforte de Lemos, reunido en representación de todos os monfortinos e monfortinas, manifesta públicamente a súa máis enérxica condena diante dos gravísimos acontecementos acaecidos na noite do venres ao sábado, cando foron lanzados contra o centro Francisco Suárez de Monforte, propiedade da institución social PRODEME, cócteles molotov que provocaron un incendio que causou danos severos no edificio de O Malvarón, afectando gravemente ó comedor ubicado na planta baixa das instalacións, edificio no que a Xunta de Galicia ten proxectada a súa reconversión nun centro de acollida de menores estranxeiros, co obxectivo de acoller uns 80 mozos.
Este ataque constitúe non só un atentado contra a seguridade e a convivencia no noso municipio, senón tamén un acto que responde a motivacións de odio, racismo e xenofobia, totalmente incompatibles cos valores democráticos que defendemos como sociedade.
Monforte de Lemas sempre foi, e seguirá sendo, unha cidade aberta, solidaria e comprometida cos dereitos humanos. A violencia, o medo e a intolerancia xamais poderán ter cabida no noso municipio nin en ningunha sociedade que aspire á xustiza e á paz.
Expresamos todo o noso apoio e solidariedade coas entidades e profesionais que traballan cada día para garantir a protección dos menores estranxeiros, a súa integración e benestar. Do mesmo xeito, confiamos plenamente no labor das Forzas e Corpos de Seguridade do Estado e da Xustiza para esclarecer os feitos e depurar as responsabilidades que correspondan.
O Concello de Monforte de Lemos fai un chamamento á cidadanía para manter a unidade fronte a calquera manifestación de odio, reafirmando o noso compromiso coa convivencia pacífica, a igualdade, a diversidade e o respecto á dignidade de todas as persoas.
Unha agresión baseada no racismo ou a xenofobia non é só un ataque contra unhas vítimas concretas, é un ataque contra toda a nosa sociedade. E a nosa resposta debe ser clara e rotunda: non hai lugar para o odio en Monforte de Lemos.
