O Concello de Pantón organiza dentro das actividades do Pacto de Estado contra a violencia de xénero un Obradoiro de Teatro Interxeracional que busca traballar a igualdade desde o teatro.
O obradoiro, aberto a todas as idades, consta de 10 sesións de 2 horas nas que as persoas participantes construirán unha peza curta de teatro sobre a violencia de xénero para rematar cun teatro foro, formato no que o público pode participar entrando en escena e propoñer cambios no guión. O teatro foro é a máis coñecida das técnicas do Teatro do Oprimido, unha concepción teatral desenvolvida nos anos 60 e 70 polo dramaturgo brasileño Augusto Boal e inspirada na pedagoxía de Paulo Freire que sitúa ao educador e ao educando nun plano de igualdade.
PRESENTACIÓN
A presentación da actividade será o día 29 de xaneiro ás 18:00 h. momento no que se valorarán as preferencias das persoas interesadas para adaptar os horarios das sesións. Durante os talleres coñeceranse técnicas de improvisación teatral ao tempo que se aborda a violencia de xénero e estratexias para combatela, convertido o grupo de teatro nun espazo seguro para poder expresarse sen medo.
Con todo, dende o concello explican que “o obxectivo último é establecer novas canles de diálogo coa veciñanza e crear espazos para xogar e construír comunidade”. As persoas interesadas poden inscribirse a través do correo educadorfamiliarpanton@gmail.com.
NOVO ENCONTRO DA ACTIVIDADE “POR QUE NOS XUNTAMOS OS HOMES?”
A actividade, que comezou a súa andaina en novembro dentro das actividades do 25N, está formulada como espazo de encontro e coidado para que os homes participantes poidan intercambiar inquedanzas sobre o seu papel nos contextos actuais e o seu compromiso para unha igualdade real.
O terceiro encontro, no que se falará sobre masculinidades, está programada para o martes 3 de febreiro ás 20:00 h. no Edificio Sociocultural de Pantón.
