O Concello de Monforte prepárase para a súa cita cunha das tradicións primaverais que se está a recuperar dende hai uns anos na cidade: Os Maios. Para preservala convova un novo Concurso de Maios e Coplas, evento que se celebrará o vindeiro 7 de maio a partir das 17.30 horas na Praza de España. A participación no certame está aberta a toda a veciñanza do concello, podendo facer a inscrición de xeito particular ou colectivo e sempre a través do Rexistro Xeral do Concello.
O Alcalde, José Tomé, convida á veciñanza a “participar nesta celebración tradicional que festexa a entrada da primavera coa lectura de coplas e a composición de montaxes florais e vexetais nas que os monfortinos e monfortinas veñen demostrando a súa orixinalidade e gran creatividade”.
PARTICIPACIÓN E CELEBRACIÓN
As bases do concurso aprobaranse o 27 de abril, aínda que o prazo para a presentación de solicitudes xa está aberto e finaliza o luns, 4 de maio, ás 14.00 horas.
A celebración terá o seu espazo central na Praza de España, onde se concentrarán os maios tras percorrer as rúas da cidade libremente. No concurso, que conta cunha partida de 1.905 €, destinaranse 1.500 € aos mellores maios, e 405 € ás mellores Coplas.
DESENVOLVEMENTO DO CONCURSO
OS MAIOS
No caso dos Maios haberá dúas modalidades, unha para Maios confeccionados por asociacións, colectivos e particulares, e outra dirixida especificamente a Maios creados polos Centros de Ensino. O xurado valorará a imaxinación, a idea, a estética, a orixinalidade, a elaboración das pezas, os materiais utilizados, e a calidade.
Por cada modalidade haberá un primeiro, un segundo e un terceiro premio e un máximo de seis accésits coas seguintes contías económicas: 1º premio 200 €, 2º premio 150 €, 3º premio 100 €, Accésits 75 €.
AS COPLAS
Neste caso, os membros do xurado valorarán a interpretación das coplas, a posta en escena, a imaxinación, a idea, a orixinalidade, os instrumentos musicais utilizados e o número de compoñentes.
No referente aos premios, establécese un primeiro, un segundo e un terceiro, ademais dun máximo de seis accésits para unha única categoría, coas seguintes contías económicas: 1º premio 100 €, 2º premio 75 €, 3º premio 50 €, Accésits 30€.
