Os amantes da música galega, especialmente deses temas que temos gardados na memoria e que se converteron en ‘clásicos’, teñen unha ocasión de revivilos na Casa da Memoria da man dos músicos Francisco Castro e Valerio Araujo. Será o vindeiro 17 de outubro ás 20:00 h. cun concerto moi especial que leva por título “Éxitos da música galega”.
Francisco Castro é escritor, editor e músico. A memoria atravesa tamén boa parte da súa traxectoria literaria: hai case vinte anos publicou “Chamádeme Simbad”, unha obra pioneira na literatura galega á hora de achegar ao público infantil a realidade do alzhéimer, inspirada na propia experiencia da súa familia. Castro estará na Casa da Memoria acompañado polo percusionista Valerio Araujo para propoñer outra maneira de regresar á memoria a través da música.
“Cancións inmortais da nosa música, desas que forman parte da banda sonora de varias xeracións e que son quen de espertar lembranzas, emocións e historias”, sinalan os organizadores de A Memoria é Náufraga convidando a gozar dun “concerto pensado para cantar, emocionarse, compartir e lembrar, aberto ao público xeral e especialmente fermoso para compartir tamén entre xeracións”.
