O Alcalde do Concello de Láncara, Darío Piñeiro López, subliñou o pasado día 13 de marzo que “nunca incumprín un acordo notarial. É unha mentira máis do señor Cubillas. Rétoo a que o demostre con documentos”.
Nas súas declaracións denunciou que “como alcalde non podo consentir que se manche a imaxe do Concello de Láncara e a miña propia con calumnias e mentiras que non teñen ningún fundamento. Esta é a forma que ten o Partido Popular de facer política, desprestixiar ás persoas, pero dende o PSOE non o imos a permitir. Que se poñan a traballar, de verdade, por Láncara e presenten iniciativas para mellorar o día a día dos nosos veciños e deixen de contaminar as institucións”.
Lembraba tamén o mandatario local que só asinou unha acta notarial nunha ocasión , e fíxoo porque a Xunta dicía ter investido 2 millóns de euros e non foi así, só se fixera achega por 1 millón. Daquela comprometeuse a dimitir se alguén demostraba que iso non era certo. Ao final ninguén puido demostrar nin probar que dicía mentira.
Noutra orde de cousas, Piñeiro anunciou o compromiso para que a empresa eólica sexa a que acondicione as estradas de Vilarín e Cortella. Os traballos, segundo dixo, comezarán de seguido e non suporán ningún gasto para as arcas municipais.
