Dende os seus inicios a Plataforma contra a A-76 pola Ribeira Sacra, asegura que mantén unha aposta clara, firme e decidida polo nomeamento desta zona como Patrimonio da Humanidade, e dí sentirse satisfeita pola oficialización da súa candidatura.

Chegado a este momento, a Plataforma recorda que, de levarse a cabo o trazado actual do proxecto da autoestrada A-76, non hai posibilidades reais de acadar o nomeamento como Patrimonio da Humanidade. O informe técnico realizado fai 4 anos, polo equipo multidisciplinar de expertos coordinado polo anterior Valedor do Pobo, recolle que, de executarse o trazado actualmente previsto para a A-76 sería totalmente imposible a declaración da Ribeira Sacra como Patrimonio da Humanidade.

A Plataforma insta aos representantes políticos a acadar unha modificación cara un trazado que “evite unha desfeita social e medioambiental e que ofreza posibilidades reais para o recoñecemento desta zona como Patrimonio  da Humanidade.”