O sábado día 9 de xuño en horario de mañá de 10:00 a 14:00 horas e en horario de tarde de 16:00 a 18:30 horas, celebrarase na Casa da Cultura Poeta Lois Pereiro de Monforte unha xornada de debate sobre a xestión sobre os lumes forestais e para a cal non é necesaria inscrición previa.

Lidia Senra, eurodeputada galega, será a encargada da xornada na que se intercambiará información e debaterá sobre os incendios forestais, as súas causas, a xestión que realizan as Administracións e posibles opcións de prevención para intentar deter unha lacra que ano tras ano arrasa os montes galegos. Con este evento preténdese propoñer alternativas ós cortalumes de terra espida ca desertizan e a desecan, contaminan a auga e erosionan o monte. Tamén ten como obxectivo afondar sobre como se pode realizar o mantemento e coidado das pistas forestais para evitar os lumes sen que se produzan danos na paisaxe e na terra. Finalmente abordaranse as melloras que se poderían facer na extinción dos incendios e analizaranse as posibilidades de valoración do monte.

organización da xornada

• 10:30 horas. Apertura da xornada por Lidia Senra cunha mesa sobre “Cortalumes verdes e outras alternativas aos cortalumes de terra espida” na que intervirán Antonio Rodríguez gandeiro de cabrún de leite e membro da COAG; Felipe Castro López, axente medioambiental da Xunta e Claudio Quintillán Vallejo, técnico de explotacións forestais e membro da Asociación Galega de Comunidades de Montes. Maribel García Díaz de Esperta Monforte será a encargada de introducir e moderar esta mesa.
• 12:15 horas. Comezo do coloquio “Avaliación das actuacións da Xunta antes, durante e despois dos lumes” onde participarán Lidia Senra, Luísa Palleres González, presidenta da Asociación de Veciños e Veciñas de Chavaga; María Teresa Rodríguez Rodríguez pertencente á mesma asociación; Orlando Gregorio Álvarez, biólogo e castañicultor no Courel e, Diego Sánchez Agra, enxeñeiro forestal e membro da Asociación Forestal Frouma.
• 16:00 horas. Celebrarase o coloquio “Aprender dos erros. O sistema de emerxencias e extinción dos lumes forestais” onde participarán Benxamín Balboa, bombeiro forestal; Davide Rodríguez, bombeiro forestal e deputado de En Marea no Parlamento Galego; Manuel Martínez Méndez, bombeiro e representante sindical da CIG en Ourense e membro da Plataforma Asociativa de Sindicatos de Bombeiros Forestais e, Vanesa Garrido Blanco, membro de C@urel Vivo.
• 17:00 horas. Para cerrar a xornada, celebrarase a mesa “Fronte o abandono da terra, a valoración do monte”, con Víctor Álvarez Arias, técnico da Consellaría do Medio Rural e concelleiro en Lugo  por LugoNovo; Félix Dominguez Cortiñas, alcalde Manzaneda e como moderadora actuará Paula Verao, deputada de En Marea no Parlamento Galego.