As Fillas de Cassandra, Bratzantifa ou Chévere son algunhas das propostas do Festival Polas Bravas, que se celebrará o próximo fin de semana (19 e 20 de maio) na localidade lucense de Chantada. Trátase dun evento gratuíto “de música e palabra”, organizado pola Asociación Polamiúda, que pretende congregar aos veciños e veciñas e á contorna con propostas culturais vangardistas feitas por “mulleres bravas galegas”.

O festival comezará o venres 19, ás 20,00 horas, no Mesón Mogay, coa actuación de ‘Noite’, que tocará algún dos seus temas orixinais e versións. Ás 21,30 será a quenda da actuación de Aldaolado, que presentarán o espectáculo ‘Sobre Sorpresa’.

A noite do venres concluirá ás 00,30 horas coa picada no Pub Lost do dúo de DJs Midori Hatta, que levarán unha sesión na que “combinarán éxitos coñecidos con xoias ocultas”. Xa no sábado, a festa comezará no parque Eloísa Rivadulla (Parque dous Pendellos) coa actuación ás 12,00 horas das artistas da Academia, unha escola de música tola. Ás 13,00 horas será a quenda de Nuria Vil co seu espectáculo de poesía escénica. Para acompañar a sesión vermú estará a DJ compostelá MeriWlson.

Ás 18,30 horas será o momento do teatro. O grupo Chévere interpretará ‘As Fillas Bravas’ no Auditorio Municipal de Chantada. Alí haberá tamén un servizo de animación e coidado para os máis pequenos durante toda a representación.

De volta ao parque Eloísa Rivadulla, ás 21,30 horas comezará a actuación das Fillas de Cassandra e ás 22,30 horas será a quenda de Bratzantifa. A terceira actuación da noite no parque correrá a cargo de Hydn. O peche a esta edición de Polas Bravas porao a partir das 00,45 horas a Dj local Lúa Desgracia.