A semana arrincou coa visita da Asociación Cultural Souto do Val, de Quiroga, e a Asociación de Veciños de Orzabai, de Lugo. Os quirogueses visitaron en primeiro lugar o Pazo de San Marcos para, posteriormente, visitar os concellos do Vicedo, Viveiro e Ourol; mentres que os lucenses comezaron a ruta na Granxa Gayoso Castro e tamén continuaron cara A Mariña para coñecer a fervenza do Pozo da Oza, no Valadouro, e o Castelo de Castrodouro, en Alfoz, entre outros recursos destes municipios.

Quiroga tamén resulta protagonista nesta iniciativa de dinamización turística e socializadora, pero á inversa, sendo un dos destinos ata onde chegará xente doutro punto da provincia de Lugo. Trátase da Asociación Parroquial de Amas de Casa e Consumidores de Santa María de Bretoña, na Pastoriza, que viaxarán ata a Ribeira Sacra para coñecer Quiroga cunha visita ao Museo Etnográfico ou o Xeomiradoiro de Campodola.

OUTROS INTERCAMBIOS COA RIBEIRA SACRA COMO PROTAGONISTA

O xoves será a quenda de dous colectivos mariñáns, a Asociación de Veciños de San Pedro de Cangas, de Foz, e da Asociación de Veciños San Vicente de Lagoa, de Alfoz. Os focegos visitarán o Pazo de San Marcos e logo desprazaranse a Sober e Monforte de Lemos.

Por último, o venres, participarán neste programa a Asociación Cultural e Deportiva Capela Sixtina de Nogueira, de Chantada, que percorrerá o Pazo de San Marcos e os concellos de Burela e Foz; e a Asociación Cultural e Deportiva do Castro  de Vilaronte, de Foz, que estará na Granxa Gayoso Castro e achegarase seguidamente ao concello de Sober e Monforte de Lemos.