Nace en Garabelos, Concello de Chantada, o ‘I Festival Desenchufado’. Faino dentro do Proxecto Cuco, Cultura contra o cambio Climatico-Cultura para coidar a Terra, como iniciativa que aposta polo decrecemento, sen cables, enchufes, bases sonoras, micros…. Unha proposta socio-cultural que xorde para combater a cultura do estrés e dos espectáculos multimedia e masificados que busca desenchufarse da contaminación, do ruído e das modas para enchufarse ao futuro dun xeito sostible e máis consciente.

No programa preséntanse a nove artistas da música, narración, circo, poesía que “encherán o bosque de Carballolandia (Garabelos / Chantada) de cultura a prol dun mundo para respirar”, comenta Anxo Moure, un dos promotores.

Ce Orquestra Pantasma, Aziz e Ayoub, Paco Ledo, Ramon Gato, Judit e Diego Miudiño, Servando Barreiro e o Carballo con Botas serán eses artistas que colaboran no I Festival Desenchufado a partir das 11:00 h. da mañá.

Colaboran na organización “Papaventos Educación Ambiental”, “Miudiño S.Cooperativa”, e “Proxecto Cuco”. Cada participante recibirá un manifesto en papel compostable con sementes para plantar.