O Presidente da Deputación, Darío Campos, xunto á Deputada pola Comarca de Chantada, Pilar García, mantiveron un encontro cos xogadores e equipo técnico do Club Baloncesto de Chantada no que se lle manifestou que a Deputación destinará 18.000 euros, cos que colaborar nos gastos de tempada desta agrupación deportiva.
O Club conta con 2 equipos senior, un que compite na Liga EBA en categoría absoluta, e outro en 3º división nacional. Ademais, tamén colaboran coas escolas deportivas, nas que participan máis de 200 rapaces de 7 a 13 anos.
O Club Baloncesto Chantada, dispón dun equipo principal que, dende o 2000, está na Liga EBA. De feito, é o único equipo a nivel nacional que leva 18 anos competindo nesta categoría de xeito ininterrompido, o que dá mostra da importancia deportiva do Club. Tamén, durante esta tempada 17-18; o equipo absoluto participou na fase de ascenso á categoría LEB Prata, quedando ás portas da tan ansiada subida
Foi acondicionado o pavillón municipal, onde o equipo realiza os adestramentos e as competicións. As obras consistiron na renovación do parqué e na construción de ramplas de acceso para as persoas con diversidade funcional. Para estas obras a Deputación destinou 80.000€
