Un total de sete coches antigos arderon no incendio dun alpendre no municipio de Taboada, no lugar de Ralle, en Vilela.

Segundo informa o 112 Galicia, un incendio derrubou por completo un alpendre en Taboada. Ademais, o lume iniciado nunha palleira propagouse a outro alpendre anexo, o que afectou o tellado, madeira e distinto material.

Membros do GES de Monterroso confirmaron que sete coches antigos que había no interior do alpendre quedaron calcinados na súa totalidade. Pola contra, os medios de extinción, lograron evitar que as chamas se propagasen a un terceiro alpendre lindeiro. Foi un dos afectados o que chamou ao 112 sobre as 17,00 para informar de que ardía un alpendre case pegado á súa casa, no cal almacenaba herba seca e, mesmo, produtos inflamables.

Foron alertados bombeiros de Chantada, membros do GES de Monterroso, Garda Civil e Protección Civil da localidade. Pasadas as 20,00 horas, o lume está controlado. Con todo, os bombeiros continúan no lugar arrefriando a zona co fin de lograr a súa total extinción.