Do 8 ó 12 de agosto o concello de Quiroga celebrará as súas Festas de Verán.
Unha programación chea de eventos lúdicos e gastronómicos disposta a facer gozar a todo aquel que se achegue á zona durante os días indicados.
Do 6 ao 9 disputarase o Torneo de Fútbol Sala Festas de Verán no pavillón municipal e o día 8 ás 23:00 horas actuación estelar da orquestra Panorama.
Ó día seguinte, o xoves día 9, e tras bailar intensamente ó son dunha das orquestras de máis sona a nivel nacional, ás 19:00 horas procederase á apertura do recinto da Festa da Xuventude e a Cervexa Artesá na Praza de España. A música para ir quentando motores correrá a cargo do quirogués DJ Michel. De seguido, ás 23:00 h., actuará a Banda de Folk Ribas de Sil e de seguido o grupo Carta de Ajuste que será o encargado de pechar a programación do día a partir das 00:30 horas.
Para o venres 10, a cita será ó mediodía coa XXVII Mostra do Mel de Quiroga. Ás 12:00 horas inaugurarase o recinto feiral e ó longo do día Os Palletas serán os encargados da animación musical. Para as 19:00 está previsto que se dispute o IV Torneo Street Soccer no Parque da Constitución. Este mesmo día tamén se celebra a XIII Festa da Comunidade no Parque da Constitución. Dende as 21:30 poderase degustar unha gran paella que irá acompañada con bebida e sobremesa e a partir das 23:00 horas actuará o dúo Camelia.
Para o sábado 11, a programación dará comezo ás 13.00 h. co desfile pola Rúa Real do espectáculo de rúa “Hakuna Matata” a cargo de Troula Animación aproveitando esta proposta do Ciclo Cultura no Camiño. Xa ás 18:30 h., no Campo de Fútbol San Martiño, terá lugar a presentación do Quiroga F.C. 2018-2019. A partir das 20:00 celebrarase o Concurso Pinta con Xiz na Praza de España e farase entrega de premios do Certame de Debuxo Infantil. A verbena desta noite correrá a cargo do grupo Podium e Atenas a partir das 22:00 horas.
O domingo 12 é o último día destas festas. A Banda de Música de Chantada será a encargada da alborada a partir das 12:30 horas polas rúas da vila ata chegar á Praza do Concello ás 13:30 horas onde ofrecerán unha actuación incluída no programa Musiqueando pola provincia de Lugo.
Para a noite, ás 21.00 h., e tamén grazas ao Ciclo Cultura no Camiño, na Praza España haberá un espectáculo de maxia a cargo do mago Martín Camiña, “Encantamentos de rúa”. De seguido o grupo Samba será o encargado de abrir as actuacións musicais nocturnas que terán continuidade ás 00:30 h con Treixadura, formación encargada de poñer o toque de música tradicional da noite. Tras a súa actuación, o grupo Samba volverá saír ó escenario para poñer fin a esta nova edición festiva quiroguesa.
