Un ano máis, a Asociación Cultural Qui-Roma organiza un evento que convirte a Quiroga nunha festa romana ‘non stop’ dende as 9:30 da mañá do sábado 19 ata a madrugada do domingo 20.
Falamos do ‘Qui-Roma’, un evento que chega este ano á súa VIII edición cunha chea de actividades variadas e para todos os públicos con protagonismo especial para a recreación do mundo romano e na que o epicentro será a Praza do Auditorio.
Como novidade desta edición, este venres 18 ás 23:00 h. organizan un concerto de pop-rock na Praza da Rúa Lago a cargo do grupo de Monforte Deloreans, unha banda que vén de participar no programa das Festas Patronais de Monforte con notable éxito.
DELOREANS
Banda monfortina nacida no ano 2020 que versiona aos clásicos da música en español desde os 80-90 ata os nosos días. No que respecta ao repertorio, este é amplo e variado destacando a fusión de estilos como o rock, pop, indie… Nos seus concertos pódense escoitar clásicos de grupos como Los Secretos, M-Clan, Fito, Radio Futura, Los Ronaldos e outros.
PROGRAMA QUI-ROMA
O sábado 19 ás 9:30 h. comeza a programación cunha ruta de cabalos e ás 11:00 h. abrirase o Mercado Qui-Romano na Praza do Auditorio. Nese espazo haberá xa obradoiros para a cativada e música a cargo dos gaiteiros ‘Os Palletas’.
O primeiro desfile romano será ás 11:30 h. a cargo da Guardia Romana Lucus Equites e percorrerá a Rúa Real de punta a punta. Rematado o percorrido, e xa de volta, farán unha demostración na Praza do Auditorio ás 12:45 h.
Ás 13:00 h. amenizará unha sesión vermú o duo ‘Dos en Punto’ e a continuación terá lugar o ‘Comilonium’ con polbo e churrasco.
Pola tarde, entre as 16:30 e 18:00 h. xogos de auga para os máis pequenos e pequenas e ás 18:00 h. obradoiro de macramé. Ademais dos xogos de auga tamén poderán participar nunha actividade de formación para ‘pequenos gladiadores’.
Ás 19:00 h. será o 2º desfile da Guardia Romana Lucus Equites e ás 19:00 h. haberá un espectáculo de clow para público familiar con Arturo Cobas no anfiteatro.
A partir das 20:30 h. poderase ver un ano máis a Mario Nogueira cos seus bois formando parte do desfile “Arde-Loucos” pola Rúa Real.
Como remate, xa pola noite, espectáculo de recreación de loita de gladiadores contra castrexos no anfiteatro, paellada e música a cargo de varios DJ. Para a 1:30 h. da madrugada está programado un ‘Gran Sorteo’.
Ao longo da xornada haberá tamén demostración de artesanía con gancho e traballos de aramio, así como a posibilidade de ver de preto os bois de Mario Nogueira.
