O Concello de Ribas de Sil vén de adxudicar as instalacións do Xeocamping a Aventeira.
A adxudicataria é unha cooperativa sen ánimo de lucro con sede social en Ourense e cunha traxectoria de máis de 5 anos no desenvolvemento de actividades de educación e tempo libre así como a dinamización cultural. “Unha das carencias que tiña esta empresa era precisamente a de contar cunhas instalacións nas que desenvolver os seus proxectos con rapaces de tódalas idades”, comentan dende o equipo de Goberno. Deste xeito, nace o primeiro campamento turístico temático de Galicia, figura de recente creación, que contribuirá a promocionar e traer xente ao Xeoparque Montañas do Courel.
O Xeocamping de Ribas de Sil conta con edificio de recepción, edificio de usos múltiples, edificio de servizos con 8 duchas e 8 baños, zona de lavandería, barbacoas, e un total de 8 bungalós, dous deles adaptados para minusválidos. Tamén contará con 14 parcelas de acampada e un almacén para apeiros. Destacan tamén unha pequena piscina De case que 2000 metros cadrados libres para posibles ampliacións no futuro. A capacidade de aloxamento estará cerca das 100 prazas.
As instalacións, ademais de servir para o desenvolvento de actividades para a cativada programadas pola cooperativa concesionaria, servirán tamén para dar aloxamento aos peregrinos e ás peregrinas do Camiño de Inverno e aos visitantes do Xeoparque e da Ribeira Sacra. Cómpre lembrar, ademais, que o conxunto turístico aloxa o Centro de Interpretación da Minaría Aurífera Romana (CIMAR).
CONCESIÓN ADMINISTRATIVA
A concesión administrativa das instalacións faise por un periodo de 10 anos e Aventeira terá que facer investimentos estruturais por importe dun mínimo de 25.000 euros nos vindeiros 5 anos e pagar un canon anual de 3.500 euros, así como facerse cargo do mantemento e apertura do CIMAR nos horarios actuais.
Segundo informan fontes do Concello, a adxudicataria está realizando os trámites administrativos necesarios para abrir as instalacións ao público o antes posible.
INVESTIMENTO
O investimento total, incluíndo o CIMAR, rolda o millón de euros cunha achega moi importante de fondos propios do Concello de Ribas de Sil e varias subvencións da Xunta de Galicia, de fondos Leader da Unión Europea e sobre todo do Plan Único da Deputación de Lugo.
