José Manuel Balseiro manifestou que a Xunta de Galicia lle requerira á alcaldesa de Sarria o 14 de febreiro que completase a solicitude da RISGA para que dez veciños da localidade fosen contratados durante sete meses cunha axuda da administración e, sen embargo, nos dez días que había de prazo non o fixo provocando a perda da axuda.
Por outra banda, o delegado provincial da Xunta de Galicia tamén salienta que se amosa sorprendido pola reacción de Pilar López Yáñez pois “en lugar de felicitarse, parece molesta polos investimentos que a administración autonómica realiza en beneficio da veciñanza deste municipio”. Segundo as súas declaracións, “a alcaldesa confúndese posto que o “Plambe” non son gastos correntes, senón investimentos reais que ela mesma puido comprobar porque estaba convidada á visita e non se presentou no IES Gregorio Fernández”.
Como xa informamos no XdL, Pilar López Yáñez dixo de Balseiro que “visita os centros educativos nos que fan actuacións como se fosen grandes logros cando en realidade son traballos que teñen que facer por lei”.
