A xuíza do Xulgado de Instrución número 1 de Sarria decretou o ingreso en prisión provisional, eludible baixo fianza de 2.000 euros, do detido polo atraco nunha sucursal bancaria.

Segundo informaron fontes do Tribunal Superior de Xustiza de Galicia (TSXG), o arrestado está acusado dun delito tentado de roubo con intimidación.

Os feitos tiveron lugar ao mediodía do xoves 6 de outubro nunha sucursal de Caixa Rural, na localidade da Pobra de San Xiao, en Láncara. A Garda Civil detivo o home que tratou de asaltar a entidade.

Tal e como relataron testemuñas presenciais dos feitos a Europa Press, os feitos tiveron lugar este xoves ao redor das 14,00 horas cando o presunto atracador entrou na sucursal cunha pistola –de balíns, aínda que simulaba ser de lume–.

O home pediulle a clave do caixeiro automático á muller que, moi nerviosa, inventou unha serie de números para gañar tempo e díxolle que os introducise el mesmo.

A muller aproveitou ese momento para fuxir e pedir axuda nun bar próximo. Alí pediu axuda aos donos do establecemento, que se puxeron en contacto co 112 e a Garda Civil. Mentres, algúns clientes saíron en busca do presunto ladrón, ao que atoparon nunha leira próxima.

Foi a propia traballadora da sucursal a que recoñeceu o home, maior de 45 anos, como o presunto atracador. Axentes da Garda Civil procederon á detención do home, que pasaba este venres a disposición xudicial.

O propio Concello de Láncara agradeceu a través das súas redes sociais a colaboración destes veciños, dos que destacou a súa “valentía”.