O festival ‘Terra Brava’ do Incio chega aos 20 anos e faino cun cartel moi interesante no que se poden atopar proxectos locais, bandas consagradas, propostas emerxentes e un grupo que achegará ao Incio música fusión de música tradicional do norte de Marrocos con outros xéneros.
A xornada deste día grande, 26 de agosto, comezará cunha sesión vermú ás 13:30 h. a cargo da Charanga Louband e un xantar popular a continuación. Este mesmo grupo volverá a actuar entre as 17:00 e as 18:00 h.
A partir das 18:00 h. terá lugar un ‘Aberto de Billarda’ para adultos/as e nenos/as puntuable para a liga nacional de billarda de verán e con importantes premios para os mellores consistentes en produtos de alimentación derivados do porco e do porco celta.
CONCERTOS
Comezarán a partir das 21:30 h. coa actuación de Xerezade, “un grupo local con integrantes da Terra Brava e da Guimaralia que está a argallar o seu primeiro traballo mesturando diversos estilos bebendo da tradición e con moita gana de festa”, comentan dende a organización.
A continuación será a quenda de Fillas de Cassandra, Dakidarria e Tandub, un proxecto este último que fusiona a música tradicional Gnawa (Norte de Marrocos, Tánxer) con outros xéneros como o reggae, o drum & bass ou a música electrónica. “Mesturando instrumentos clásicos da banda, electrónica e instrumentos tradicionais marroquís como o hajhouj ou as carcabas, conseguen un son que non deixa indiferente a ninguén”, explican tamén dende o festival. Como achega novidosa á actuación, cómpre saber que como complemento artístico durante os concertos un dos cantantes realiza unha pintura en directo.
O remate poñerao o DJ Elias Vieira a partir das 3:45 h. da madrugada.
Colaboran na organización a Área de Cultura da Vicepresidencia da Deputación de Lugo, o Concello do Incio e a Asoc. As Xeitosas, Caixa Rural e a Xunta de Galicia.
