O Concello de Sarria repite os concursos do pasado ano, agás o de vídeo, e incorpora un novo, o de ‘Deseño e decoración de postais de Nadal’, para fomentar a creatividade e incentivar a participación cidadá na ambientación de Nadal.
Haberá moitos premios en cada unha das catro categorías nas que se pode participar que compensarán gastos realizados polos gañadores e premiarán a súa implicación. Consistirán en ‘tarxetas agasallo’ canxeables en establecementos de Sarria, co cal os cartos repercutirán no comercio local.
Estes son os diferentes concursos que vén de anunciar o Concello de Sarria:
II Concurso de Fotografía “Desde Sarria con amor” 2021 destinado a todas as persoas que poden presentarse de forma individual ou colectiva. Cómpre enviar fotografías nas que saia algunha decoración de Nadal de Sarria. As fotos enviaranse a turismo@sarria.gal antes do 20 de decembro e os premios consistirán en 6 tarxetas agasallo de 300, 250, 200, 150, 100 e 50 euros respectivamente.
II Concurso de Deseño e Decoración de Bolas de Nadal 2021 destinado a cativos/as nacidos entre o 2005 e o 2018. Presentaranse os traballos na Biblioteca Municipal Camilo Gonsar antes do 21 de decembro e dentro dunha caixa ou bolsa. O xurado terá coñecementos artísticos e establécense tres categorías de premios dependendo da idade. Así, haberá unha categoría ata 6 anos, outra entre 7 e 12 e outra para maiores de 13. Respecto dos premios, haberá tres tarxetas agasallo por categoría de 300, 200 e 100 euros respectivamente.
II Concurso de Decoración de Nadal 2021 establecéndose unha única modalidade a diferenza do ano anterior. Entrarán a concurso a decoración da fachada, balcón, ventá, terraza, xardín ou porta exterior, pero tamén a decoración de elementos do interior da vivenda. As inscricións faranse no concello fisicamente ou pola sede electrónica antes do 22 de decembro. O xurado estará composto por tres persoas con coñecementos de deseño e decoración e os premios consistirán en dez tarxetas agasallo de 300, 250, 200, 150, 100 e 50 euros do sexto ao décimo posto.
I Edición do Concurso de deseño e decoración de postais de Nadal 2021 para participantes de 0 a 122 anos sendo a presentación das mesmas de forma individual. As inscricións faranse na Biblioteca Pública Municipal Camilo Gonsar entregando a felicitación en sobre pechado xunto coa ficha de inscrición. O xurado, formado por tres persoas terá coñecementos artísticos e os premios –cinco en total– consistirán en 5 tarxetas agasallo de 300, 250 200, 150 e 100 euros respectivamente.
As bases ao detalle e as fichas de inscrición están publicadas na páxina web do concello.
