A Xunta de Galicia concedía o pasado 28 de setembro a autorización para a celebración da corrida de touros de Sarria. Este era o único escollo que quedaba para poder celebrala, e a única esperanza de en Marea ou a plataforma Galicia, Mellor Sen Touradas para que non se levase a cabo. Desde a plataforma levan días traballando e organizando manifestacións en contra desta actividade. Depois das convocadas o día 27 coincidindo coa celebración dun pleno para abordar a posición do concello con respecto ás corridas de touros, a seguinte convocatoria era a de hoxe, coincidindo coa corrida.

A hora fixada para o comezo da corrida de touros era as 16.30, para media hora antes Galicia, Mellor Sen Touradas convocaba a súa concentración.

Unha vez que o concello non cedeu terreos municipais, a actividade celebrouse en propiedade particular, na rúa Castelao, nunha praza portátil con capacidade para 1.900 persoas. Asistiron á corrida, varios centos de persoas e á concentración, varias decenas. Para comprobar que o espectáculo estaba dentro da legalidade e para vixiar que non houbera altercados, entre a praza e os manifestantes creouse un forte dispositivo antidisturbios con persoal da Sección de Intervención Rápida (SIR) da Garda Civil, compañeiros do cuartel de Sarria, Policía Local de Sarria e Policía Nacional adscrita á Xunta. Había ademais 2 ambulancias do 061. Galicia, Mellor Sen Touradas recollería no seu Facebook este feito, preguntándose que facía o 061 nun espectáculo privado.

Tortura, nin Arte nin Cultura era o slogan que rezaban as pancartas dos manifestantes que berraban en contra do espectáculo. Finalmente non houbo que lamentar altercados graves, si un par de incidentes “leves” con responsables dunha e doutra banda, froito do acaloramento das dúas posturas.