O próximo 13 de xullo celebrarase no Espazo Ribeira Sacra de Ferreira de Pantón a Batalla de Grupos que inaugura a programación da primeira edición do Trece Roeis Fest. Trátase do primeiro evento deste tipo que se celebra en Pantón dende a despedida do Festival do Castro no ano 2017.

A organización do festival sinalou que “a inscrición foi un éxito rotundo” e anunciou que foron un total de 16 as bandas seleccionadas para participar na Batalla de Grupos, cunha ampla variedade de xéneros (cumbia, metalcore, folk, rock, etc.) pero cun denominador común: todos fan música en galego. Os conxuntos que competirán o próximo mes son Searas, Folkongrelos, Los Jinetes del Trópico, Enxeito, Malasömbra, Rebezo, Cabodano Metalcore, Flúe, Mileth, Flow do Toxo, Bakarrá, Fabio Bum Rap, Fóra Ostias, Impulsos Criminais, Aamigafea e Maina Materia.

Os encargados de xuzgar as súas actuacións serán Patricia Hermida (mánager de grupos como Herdeiros da Crus), Charli Domínguez (baixista e fundador do grupo Los Suaves), Rendi Nue (artista musical contemporánea) e Emilio Rúa (cantautor). O gañador poderá gravar un disco e un videoclip para o seu tema principal, e terán a oportunidade de tocar no escenario do Trece Roeis Fest o 17 de agosto.

A Batalla comezará ás doce do mediodía e prevese que remate de madrugada. Quen desexe ser testemuña deste espectáculo poderá acudir de balde e disporá dun espazo de acampada tamén gratuíto.