O Alcalde de Monforte, José Tomé Roca, e a Concelleira de Cultura, Marina Doutón, presentaron xa o programa definitivo das Festas Patronais do municipio. Terán lugar entre os días 11 e 16 de agosto e inclúen actuacións musicais dunha gran variedade de estilos.

Tomé afirmou que para o Goberno Local “o obxectivo de ofrecer unha ampla diversidade de actividades para dar satisfacción a todo tipo de públicos”. O Alcalde insistiu en que, ademais de grandes concertos, nas Festas Patronais monfortinas tamén terán unha ampla presenza os artistas da vila. Durante as celebracións, na Praza de España actuarán os Xograres de Lemos, a Banda Municipal, a Coral municipal, o Grupo de Danza e de Gaitas Municipais e outros grupos monfortinos.

En canto ás actuacións da Compañía, o luns día 12 será posible desfrutar da presenza do grupo madrileño DVICIO e a Orquestra Marbella, O martes día 13 será a quenda do venezolano Carlos Baute e a Orquestra Finisterre, o mércores 14 amenizarán a verbena a Chenoa e a Orquestra Principal, o xoves día 15 actuarán o cantante Blas Cantó e a Orquestra La Oca e pecharán as festas o venres 16 a Orquestra Panorama e o Grupo Sr. Aliaga.

O mandatario local lembrou tamén o compromiso do Goberno de organizar unhas festas á altura do que merece unha cidade como Monforte e “acordes co que necesita o noso tecido produtivo como é o comercio, a hostalería e todo o relacionado co mundo do turismo, porque as Festas Patronais son un revulsivo económico que permite que moitas pequenas empresas garantan a súa pervivencia pola actividade económica que desenvolven durante o verán”.