O Concello de Monforte presenta unha ampla programación escénica para o derradeiro trimestre do ano. Nada máis e nada menos que 17 serán as actividades que se desenvolverán aproveitando os diferentes circuítos públicos subvencionados que ofrecen Xunta de Galicia e Deputación de Lugo.
Así, pois, participa no ciclo Ler Conta Moito, FalaREDES e Rede de Teatros e Auditorios, circuítos que promove e cofinancia a Xunta de Galicia, e nos programas Buxiganga e Proscenio que financia a Deputación de Lugo.
A presentación desta completa programación correu a cargo da Concelleira de Cultura, Marina Doutón, quen explicou polo miúdo o programa que está deseñado para atender a demanda tanto dun público adulto coma dun público familiar e infantil.
Programa completo ao detalle
Ciclo ‘Ler conta moito’
Este programa vai dirixido ao público infantil e de ensino primario para o fomento da lectura. Desenvolverase dentro da Biblioteca Municipal de Monforte coas seguintes actividades:
-Xoves 26 de setembro, Leo Leiño: Maxia e libriños.
-Venres 4 de outubro, Mago Deimi: A maxia está nos libros.
-Xoves 17 de outubro, Mere Clown: A verdadeira historia de Hamerlin.
-Xoves 24 de outubro, Carlos Coira: As marabillosas ideas do señor Basilio
Ciclo ‘Ler conta moito-Violencia de xénero’
Este mesmo programa contempla unha programación específica para educar contra a violencia de xénero. Dentro do mesmo, o concello escolleu as seguintes actividades:
-Venres 11 de outubro, Marionetas Trécola: Cociñando en igualdade.
-Venres 18 de outubro, Brais das Hortas: Contamos todas.
Todas estas obras serán desenvolvidas en horario lectivo de mañá e son totalmente gratuítas para os participantes.
Rede de Teatros e Auditorios
Dentro da Rede Galega de Teatro que promove o AGADIC da Xunta de Galicia, o Concello programa 5 obras de teatro dirixidas a público adulto:
-Xoves 17 de outubro, Talia Teatro coa obra Vida de cans.
-Xoves 31 de outubro De Ste Xeito Producións coa obra Running.
-Xoves 14 de novembro Teatro da Rambola coa peza O meu mundo non é deste reino. Trátase dunhaobra de Manuel María que foi gañadora dun concurso da Fundación Manuel María coa que o Concello de Monforte adquiriu o compromiso da súa representación na cidade. Esta obra foi presentada no Teatro Rosalía da Coruña, á cal foi invitado o Concello de Monforte.
-Xoves 28 de novembro Redrum Teatro coa peza Invisibles. Unha peza teatral con visión de xénero que visibiliza a lacra da violencia de xénero. Foi escollida e encaixada nesta data para commemorar o Día da Violencia de Xénero (25 de novembro).
-Xoves 12 de decembro Culturactva coa obra Senior.
Todas estas obras vanse representar no Edificio Multiusos ás 20.15 da tarde cun custe de 5 euros para adultos, e de 3 para xubilados e desempregados.
Programa de Teatro Afeccionado “Buxiganga”
Este ciclo ofrece a concellos de Lugo obras de teatro levadas a escena por compañías de teatro afeccionado da provincia.
-Sábado 26 de outubro Teatreiras coa obra Pros e contras.
-Sábado 16 de novembro Grupo Teatro Viraventos coa obra Sucesos.
Representaranse na Casa da Cultura Lois Pereiro ás 20:00 horas e serán de balde.
Programa FalaRedes
Programa de dinamización lingüística que promove e financia a Secretaría de Política Lingüística da Xunta de Galicia. Dentro deste ciclo levarase a escena o 25 de outubro ás 19:00 horas no Edificio Multiusos a obra de Talía Teatro titulada Voa, voa! (entrada de balde).
Programa Proscenio
Outro programa teatral financiado pola Deputación de Lugo, pero neste caso a cargo de actores e actrices profesionais. As obras programadas son:
-Luns 23 de decembro. Lilá Teatro coa obra Dun can de palleiro.
-Venres 27 de decembro, Lucecús Teatro, coa obra A verdadeira historia do poeta Manuel de Paderna.
-Luns 30 de decembro, Titiriterra coa obra Belermina, a fabulosa velutina.
Estas son un conxunto de obras dirixidas o público infantil e familiar que se representarán no Edificio Multiusos ás 18:00 horas, con entrada de balde.
