A campaña de divulgación da toponimia ‘Toponimízate! Falámosche dos nomes da túa terra’ chegará esta semana a Folgoso do Courel. O especialista en toponimia Vicente Feijoo, membro do Seminario de Onomástica da Real Academia Galega, impartirá as charlas sobre os topónimos deste concello. As sesións de Toponimízate contan coas achegas do académico correspondente Gonzalo Navaza na parte relativa á orixe e significado dos nomes dos municipios e das súas parroquias.

Toponimízate é unha campaña coordinada pola Real Academia Galega coa colaboración da Secretaría Xeral de Política Lingüística, e enmárcase dentro dos proxectos Toponimia de Galicia e GeoArpad que coordina a Xunta de Galicia.

O luns 16 de decembro chegará a Folgoso de Courel, onde o especialista da Academia visitará, ás 14:30 horas, o CPI Poeta Uxío Novoneyra. Alén de profundar nos nomes dos lugares habitados, as persoas asistentes poderán coñecer a aplicación colaborativa que lles permitirá participar na preservación e difusión da microtoponimia a través da xeolocalización. Ademais, explicarase con exemplos prácticos as utilidades desta información xeolocalizada e normativizada para distintas actuacións sobre o territorio dos técnicos municipais (PXOM, catastro…), para a promoción turística de elementos de interese cultural de cada concello ou mesmo para o ensino, polo carácter transversal e multidisciplinar dos contidos toponímicos.