José Tomé Roca, que dixo ser o primeiro mandatario provincial en visitar as instalacións da Fundación Uxío Novoneyra, recoñeceu que “é un pracer visitar por primeira vez esta casa que a familia de Uxío Novoneyra recuperou para dar a coñecer o patrimonio e a súa historia”. “Ademais, traballan para a recuperación da paisaxe ou o impulso de actividades culturais, onde se dá a coñecer a historia e a cultura labrega”, afirmou.

“A recuperación do noso patrimonio é moi importante porque, se isto se perde, nuns anos ninguén saberá o que había nin coñecerá a historia que hai detrás. Por iso, dende a Deputación valoramos o traballo diario desta entidade e seguiremos colaborando. Isto forma parte da nosa historia”, subliñou José Tomé.

O traballo da entidade foi recoñecido na primeira edición dos premios á excelencia turística da provincia convocados polo Consello de Turismo no ano 2020. Así mesmo, a institución provincial achegou no 2021 a cantidade de 16.500 € á entidade cultural, subvención que permitiu a contratación de tres técnicos a media xornada. Este ano inviste 20.000 € a través doutra subvención nominativa da área de Cultura.

Uxío Novo, fillo do senlleiro poeta lucense Uxío Novoneyra, celebrou a visita do Presidente e destacou que “despois de anos de traballo na protección e conservación do legado de Uxío Novoneyra estamos orgullosos de poder render contas e amosar o resultado de 12 anos de colaboración permanente”. O secretario destacou que o apoio provincial permitiu á fundación Uxío Novoneyra ser “unha entidade innovadora dentro do patrimonio cultural do noso país”.

Durante a visita, José Tomé, asinou no Libro de Honra da entidade.